SERVICE NG MGA SENIOR CITIZENS NA KUMUBRA NG AYUDA, INANOD SA ILOG; 8 PATAY

December 11, 2022

Tags

Metro News

Walo katao ang kumpirmadong patay matapos tangayin ng rumaragasang tubig baha ang service ng mga senior citizens na kumubra ng ayuda sa Tanay, Rizal, nitong Sabado ng gabi, Dec. 10.

Ayon sa ulat ng Municipal Disaster Risk Reduction Management Office (MDRRMO) ng Tanay, Rizal, karamihan sa sakay ng naanod na jeep ay mga senior citizens na nag-withdraw sa Landbank ng kanilang Unconditional Cash Transfer mula sa Department of Social Welfare and Development (DSWD).

Kwento ng residenteng si Michael Baylon sa Radyo Pilipinas, halos lahat ng nasawi ay mga senior citizen at isang bata.

Sinabi ni Baylon na dalawang jeep ang nirentahan ng mga biktima para sabay-sabay na makapag-withdraw ng kanilang ayuda.

Dalawang oras daw ang layo ng kanilang biyahe papuntang bayan kaya minabuti ng mga biktima na magsama-sama sa pag-withdraw para makatipid sa bayad.

Una raw nakatawid ang isang jeep sa ilog na sakop ng Barangay Sta. Ines, pero nang palusong na ang sinasakyan ng mga nasawi, biglang tumaas ang tubig at inanod ang jeep sa malalim na bahagi ng ilog.

Nakaresponde pa raw ang ilang residente ng barangay habang nakatagilid ang jeep, pero dahil sa biglang ragasa ng tubig ay agad itong nalubog sa gitna ng ilog.

Sa follow-up report ng Radyo Pilipinas, dinala sa covered court ng Brgy. Sta. Ines ang mga narekober na bangkay.

Bukod sa walong kumpirmadong nasawi, dalawang biktima pa ang pinaghahanap ng rescue team ng Tanay MDRRMO.