SENADO, GAGAMITIN ANG MAHABANG CHRISTMAS BREAK PARA PAG-ARALAN ANG MAHARLIKA INVESTMENT FUND

December 16, 2022

Tags

National News

Mahigit isang buwan ang magiging preparasyon ng Senado bago isalang ang pag-busisi sa House Bill 6608 o ang Maharlika Investment Fund (MIF) na lumusot na sa final reading ng Kamara kahapon, Dec. 15.

Dahil naka-adjourn na ang Senado simula kahapon para sa tradisyunal na Christmas break, magbabalik ang sesyon ng Mataas na Kapulungan sa ganap na alas-3:01 ng hapon sa January 23, 2023.

Tiniyak ni Senate Majority Leader Joel Villanueva na pag-aaralan nilang mabuti ang HB 6608 habang naka-Christmas break ang Senado, lalo’t sinertipikahan itong urgent bill ni Pangulong Ferdinand “Bongbong” Marcos Jr.

Ayon kay Villanueva, siguradong sasapat ang mahigit isang buwang bakasyon ng mga senador para makapag muni-muni at mapag-aralang mabuti ang konteksto at hangarin ng Maharlika sovereign wealth fund.

Sinabi ni Villanueva na siguradong dadaan sa masusing deliberasyon at debate sa Senado ang laman ng HB 6608 bago ito lumusot sa susunod na hakbang.

Iginiit ni Villanueva na suportado niya ang ideya ng pagtatatag ng isang sovereign investment fund, pero kailangan aniya na may sapat na hakbang para maprotektahan ang paggamit sa pondo nito.

Sa kabila nito, sinabi ng senador na hindi naman lulusot ang panukala kung ibabase lamang ito sa kanyang personal na pananaw.

Bandang huli aniya, pagdedesisyunan pa rin ito ng buong kapulungan ng Senado bago umusad ang panukala.