‘HOLIDAY BLUES’ O KALUNGKUTAN TUWING SASAPIT ANG KAPASKUHAN, BAKIT ITO NARARAMDAMAN?

Ang pasko ay isang masayang selebrasyon na ipinagdiriwang sa iba’t-ibang panig ng mundo, subalit sa kabila nito, may mga iilan ding nakakaranas ng ‘holiday blues’ o kalungkutan tuwing sasapit ang araw na ito.

Sa bansa na may malamig na klima, isang kondisyon ang nararanasan ng ilang indibidwal na tinatawag na Seasonal Affective Disorder o SAD.

Ang SAD –kilala rin sa tawag na winter depression – ay isang uri ng depression na dulot ng pabago-bagong panahon. Kadalasan itong nagpapakita ng senyales tuwing taglagas (fall) hanggang taglamig (winter)

Dahil sa kakulangan ng sikat ng araw, bumababa ang serotonin level na umaapekto sa mood ng isang tao na kalauna’y maaaring humantong sa depresyon.

Samantala, ang holiday blues o pagiging malungkot bago ang pasko ay tipikal na nararamdaman din ng ilang Pilipino ayon sa National Center for Mental Health ng Department of Health (DOH).

“Nangyayari talaga ‘yun. They may feel sad or anxious since patapos na ang taon, people may begin to reflect on their lives pati sa kanilang mga regrets sa buhay,” ani Joseph Bonifacio, program coordinator ng NCMH sa isang panayam ng Bitag Media Digital (BMD).

Ayon sa NCMH, maraming dahilan kung bakit nararanasan ng mga tao ang holiday blues. Isa na rito ay ang kakulangan ng sapat na pera upang paghandaan ang pasko.

“Pag holiday marami tayong ginagastos for food and gifts. Some are struggling financially and stressful ‘yun sa kanila lalo na kapag hindi sila makapagprovide nung mga bagay na ‘yun during the holidays,” ani Bonifacio.

Bukod dito, ang biglaang pagpanaw ng mahal sa buhay gayundin ang pagiging malayo sa pamilya ay nakakadagdag din sa nararamdamang kalungkutan ng isang indibidwal tuwing sasapit ang kapaskuhan.

Ilan sa mga sintomas ng holiday blues ay kawalan ng lakas at gana, pagiging iritable, hirap sa pagtulog at pagbigat ng timbang.

Bagama’t lumilipas din agad ang holiday blues kumpara sa mga clinically diagnosed anxiety and depression, mahalaga parin daw na pagtuunan ito ng pansin.

“They should do self care activities. Keep theirselves busy with their hobbies, do sports or simply watch their favorite movies or series. Importante din na may open communication sila sa kanilang pamilya at iba pang mga tao na kanilang pinagkakatiwalaan,” payo ni Bonifacio.

Hinimok naman ni Bonifacio ang sinumang may pinagdadaanan na mental health problem na makipagugnayan sa NCMH hotline sa mga numerong: 1800-1888-1553, 0966-351-4518, 0917-899-8727, 0908-639-2672