“KIDNAPPING” SA MAGKASINTAHAN SA CEBU PORT, IIMBESTIGAHAN NA NG PNP AT NBI

January 18, 2023

Tags

Provincial News

Magsasagawa ng malalim na imbestigasyon ang Police Regional Office Central Visayas (PRO-7) sa nangyaring pagdukot sa dalawang development workers sa pantalan sa Cebu City.

Inutusan ng PNP-PRO-7 ang Cebu Port Authority (CPA) na ilabas ang laman ng closed-circuit television footage (CCTV) sa loob ng pantalan noong araw na naganap ang insidente ng pagdukot sa magkasintahang Armand Jake Dayoha at Dyan Gumanao.

Si Dayoha ay miyembro ng Alliance of Concerned Teachers, habang si Gumanao ay volunteer organizer sa AMA Sugbu-KMU o Alyansa sa mga Mamumuo sa Sugbo-Kilusang Mayo Uno.

A-10 ng Enero nang dukutin ang magkasintahan sa Port of Cebu matapos ang kanilang bakasyon sa Mindanao.

Kumalat din ang isang video ng umano’y pagdukot sa dalawa habang nasa Cebu Port, na nakuhanan ng isang concerned netizen.

Nitong Lunes, ligtas na nakabalik ang dalawa sa kanilang mga pamilya matapos matagpuan sa sa isang resort sa Carmen, Cebu.

Sinabi ni Police Brigadier General Jerry Fornaleza Bearis, Police Regional Office Central Visayas (PRO-7) Director, na magsasagawa sila ng masinsinan at patas na imbestigasyon sa insidente lalo’t sinasabi ng mga magulang na mga nagpakilalang pulis ang dumukot sa dalawa.

Samantala, makikialam na din ang National Bureau of Investigation sa nangyaring insidente.

Sinabi ni Department of Justice Secretary Jesus Crispin Remulla, kumakalap na sila ng mga karagdagan impormasyon upang masuri ng National Bureau of Investigation – Cebu.