MENTAL HEALTH MOVEMENT PARA SA HEALTH WORKERS, INILUNSAD

January 19, 2023

Tags

National News

Inilunsad ng Department of Health (DOH) ang isang inisyatibong naglalayong suportahan, protektahan at pangalagaan ang mental health at well-being ng mahigit 3,000 health workers sa bansa.

Tinawag na “The Wellness Movement” ang programang ito ay nabuo sa pakikipagtulungan ng World Health Organization (WHO) at Australian government. Pangunahing layunin ng kolaborasyong ito na mabigyan ang mga “wellness warrior” ng low-cost practical tool na kanilang magagamit base sa kanilang mga pangangailangan sa araw-araw.

“The DOH’s Wellness Movement draws on practical behavioural approaches to improve the well-being of healthcare workers at their workplace and beyond,” saad ng WHO sa kanilang statement.

Ang inisyatibong ito ay alinsunod sa Mental Health Act ng bansa na nagrerekomenda ng mga stratehiyang magtataguyod sa kalusugan ng isang manggagawa sa trabaho.

“Creating a mental-health positive culture in our workplace is integral to the flourishing of not only our healthcare workers as they fulfill their role as healers but also the cultivation of relationships among their families and friends, as they bring home healthy habits for mental health and wellness,” wika ni Health Assistant Secretary Dr. Beverly Lorraine Ho.

Base sa global report ng WHO noong Oct. 2022, 23 hanggang 46 porsyento ng mga healthcare workers ay nag ulat ng mga sintomas ng anxiety, 20-37% ay nakaranas ng sintomas ng depression, habang 41 hanggang 52 porsyento naman ang nakaramdam ng burnout noong COVID-19 pandemic.

Samantala, ayon kay Australian Ambassador to the Philippines Hae Kyong “HK” Yu, ang programang ito ay bahagi ng mas malaking tulong at suporta ng Australia sa pagsusulong ng mental health wellness sa bansa sa pamamagitan ng Project BRAVE (Building COVID-safe Responses and Voices for Equity).

“At the onset of the pandemic, we built on our partnerships with DoH, WHO and other UN agencies to identify sustainable solutions to these challenges and deliver practical support to health workers,” ani Yu.

Inilunsad ang Wellness Movement noong Lunes, Enero 16 sa Philippine Children’s Medical Center (PCMC) at susundan ito ng virtual rollout ng mga community pod sa 30 pribado at pampublikong ospital sa buong bansa.