BUCOR, SINAMPAHAN NG KASONG PLUNDER AT GRAFT SI BANTAG

February 8, 2023

Tags

National News

Nahaharap sa kasong pandarambong at malversation of funds ang suspendidong hepe ng Bureau of Corrections (BuCor) na si Gerald Bantag at anim na iba pang opisyal ng ahensiya.

Inihain ni BuCor acting chief Gregorio Catapang Jr. ang mga kaso noong lunes, Feb. 6, sa Department of Justice (DOJ) kung saan inakusahan nito si Bantag at kanyang grupo ng sabwatan sa pagpapagawa ng tatlong bilangguan na nagkakahalaga ng 1 bilyon piso.

Bukod pa rito, nahaharap din sa kasong graft and corruption at paglabag sa Code of Conduct and Ethical Standards for Public Officials and Employees si Bantag.

Sa anim na pahinang reklamo, sinabi ng BuCor na isang bilyon pisong proyekto para sa pagpatatayo ng mga bilangguan sa Davao Prison and Penal Farm, Leyte Regional Prison, at Iwahig Prison and Penal Farm sa Puerto Princesa City, Palawan ang sumailalim sa bidding noong Setyembre 17, 2020 habang si Bantag ang nakaupong direktor.

“Respondent Bantag in conspiracy with, and with indispensable complicity of, the other herein respondents, has purposely and systematically orchestrated the diversion/misappropriation and/or consenting or permitting other persons, to take public funds, of the Bureau of Corrections,” ayon sa reklamo.

Ayon kay Catapang, minanipula umano ni Bantag at ng kanyang grupo ang resulta ng bidding matapos nitong bumuo ng hiwalay na BuCor Bidding and Award Committee (BAC) para sa pagpapatayo ng tatlong nabanggit na imprastraktura.

Kabilang sa mga sinampahan ng kaso ay sina BuCor Technical Supt. Arnold Guzman, Insp. Ric Rocaturba, Insp. Solomon Areniego, Technical Officer 1 Jor-el de Jesus at CTO2 Angelo Castillo at Alexis Catindig.

Matatandaang may una nang hinaharap na kasong murder si Bantag sa nangyaring pagpaslang sa broadcaster at commentator na si Percival “Percy Lapid” Mabasa noong nakaraang taon.