PINAY GF DAW NI ROMAN REIGNS, NAGPA-BITAG

April 14, 2023

Tags

Bitag Exclusives

Trending ngayon sa social media ang sumbong ng isang nagpakilalang girlfriend ng sikat na WWE Wrestler na si Roman Reigns.

Mula Ifugao ay bumaba siya ng Maynila upang personal na magreklamo sa #ipaBITAGmo.

Ang sumbong, pangi-ipit ng isang courier service company ng mga ipinadalang package daw ng kaniyang boyfriend na si Roman Reigns.

Ayon sa nagrereklamo, nagkakilala sila ng wrestler na si Reigns sa social media. Apat na buwan na daw silang magkasintahan.

Araw-araw kung sila’y mag-usap ng kasintahang wrestler. Subalit sa chat niya lamang ito nakakausap dahil ipinagbabawal daw kasi ng kumpanya ni Reigns ang pakikipag-video call sa iba.

Nitong Marso, nagpadala daw si Reigns ng ‘special package’ para sa kanya. Ang laman ng package, invitation letter at SIM card mula sa Amerika, at cash na nagkakahalagang US$20,000.

Nang kontakin daw siya ng “Curier Eagles Delivery Services Corp” na pinadalhan ng BF na si Reigns, pinagbayad siya ng P15,000 para sa tax. Agad namang nagbayad ang nagrereklamo sa pamamagitan ng GCash.

Subalit matapos makapagbayad, muli daw humirit ng pera ang courier company. Hindi umano ire-release ang package mula kay Reigns kapag siya nagbayad.

Paliwanag ni Ben Tulfo, maraming palatandaan na ang nagrereklamo ay biktima ng “online romance scam” o “love scam.”

Isa na rito ay ang hindi pakikipag-video call ni Reigns sa kaniyang Pinay GF. Tanging sa chat lamang ito nakikipag-usap.

Dagdag ni Tulfo, kapansin-pansin din ang mali-maling spelling at grammar ng nagpapakilalang si Roman Reigns sa kaniyang mga chat.

Nakumbinsi kaya ng BITAG ang nagrereklamo na siya ay na-scam o naloko? Alamin ang buong detalye: