Arestado ang 19-anyos na lalaki matapos nitong pagsasaksakin at mapatay ang isang babae sa loob ng isang hotel sa Sta. Cruz, Manila

Ayon sa Manila Police District (MPD), natagpuan sa sahig ng hotel room ang duguang katawan ng biktimang si Marilou Lagidao Baldres, 32-anyos bandang alas dos ng madaling araw noong Jan. 29.

Tinukoy naman ang suspek na si Naif Dumare Imam, residente ng Quaipo, Manila 

Batay sa isinagawang imbestigasyon, pumayag umano ang biktima na mag check in sa hotel kasama ang suspek sa halagang P400.

Subalit kinalaunan, nagtalo ang dalawa sa napagkasunduang halaga.

Isang empleyado naman ng nasabing hotel ang nakasaksi sa nangyaring krimen na naging susi sa mabilis na pagkaaresto ni Imam.

Ayon sa imbestigador ng kaso na si Cpl. Errhol Aguila, labing tatlong tama ng mga saksak ang tinamo ng biktima mula sa suspek.

Giit naman ng suspek, dinepensahan lang daw umano nito ang kanyang sarili sa biktima na siyang may ari ng narekober na kutsilyo.

Nahaharap sa kasong murder si Imam na kasalukuyang nasa kustodiya ng MPD.