Nagpahayag ng suporta sa Pilipinas ang limang malalaking bansa matapos ang nangyaring “laser incident” sa West Philippine Sea (WPS) noong nakaraang linggo.
Ito yung insidente noong Pebrero 6 kung saan tinutukan ng military grade laser ng Chinese Coast Guard (CCG) ang barko ng Philippine Coast Guard (PCG) na sakay ang mga tripulante nito.
Nauna nang nagpahayag ng suporta ang Amerika sa Pilipinas na sinundan din ng apat pang bansang trade and development partners ng Pinas. Ito ang mga bansang Japan, Australia, Canada at Germany.
The PRC’s conduct was provocative and unsafe, resulting in the temporary blindness of the crewmembers of the BRP Malapascua and interfering with the Philippines’ lawful operations in and around Second Thomas Shoal,” pahayag ni US State Department spokesperson Ned Price.
Hinikayat rin ng nabanggit na limang bansa ang China na sundin ang utos at desisyon ng Hague-based Permanent Court of Arbitration (PCA) noong 2016 na nagsasabing pag-aari ng Pilipinas ang teritoryo na pilit ang inaagaw ng China.
Matatandaang noong Martes, Pebrero 14, naghain ng diplomatic protest ang Pilipinas laban sa ginawang pag-atake ng bansang China. Habang ipinatawag naman ni Pangulong Ferdinand Marcos si Chinese Ambassador Huang Xilian sa Malakanyang sa dumadalas at tumitindi pang aksyon ng kanilang bansa laban sa PCG at mga Pilipinong mangingisda.
