Sinuntok lang, Hindi Binugbog: Among Chinese, pina-BITAG ng Driver

March 31, 2023

Tags

Bitag Exclusives

Suntok at mura ang inabot ng isang personal driver matapos niyang awatin sa pakikipag-away ang kaniyang among Chinese sa isang beerhouse sa Divisoria.

Apat na taon ng nagmamaneho si Virgilio Lovindino Jr. Madalas daw siyang murahin at saktan ng among si Willie Choi lalo na kung ito ay nalalasing.

Nitong a-11 ng Marso ang pinakuhuling insidente kung saan pinagsusuntok at pinagmumura siya ng amo pagkauwi nila sa bahay.

Noong gabi ding ‘yun, pinagbantaan siya ng kaniyang amo. Sa takot ay lumapit si Virgilio sa BITAG.

“Wala akong pakialam kahit saan ka pa magsumbong! Hindi ako natatakot, marami akong pera,” banta umano ng among si Willie kay Virgilio.

Hindi naman tumangging sagutin ng among si Willie ang reklamo laban sa kaniya. Sa programang #ipaBITAGmo sa telebisyon, kinumpirma niyang lasing siya noong gabing ‘yun.

“Talaga pong nalasing lang ako, talaga pong nasuntok ko. Suntok lang pero ‘di bugbog. Kaya nga po pinapakiusapan, dalawang beses kaming nakiusap at humihingi ng sorry pero sabi niya mag-iisip pa siya,” paliwanag ni Willie kay Ben Tulfo.

“Willie, ‘pag inulit mo ‘to, ‘pag sinuntok mo ito ulti, ako na makakabangga mo. Hindi ako nagbibiro Willie. Gusto ko bumalik siya [Virgilio] sa’yo,” mensaheng iniwan ni Tulfo sa inirereklamong amo.

Nangako ang inirereklamong amo na hindi na niya uulitin ang nagawang pananakit sa kaniyang driver.

Nagbigay rin ito ng halagang P20,000 sa pobreng driver bilang paumanhin sa nagawang pagkakamali.

“Ang mga tao natin, mahalin natin dahil naninilbihan sila sa atin. Pinagsisilbihan nila tayo. Kung wala sila, hindi magiging magaan ang takbo ng buhay natin dahil kinakailangan natin ng alalay,” paalala ni Tulfo.

PANOORIN ang buong kwento: