LALAKI, SINABUYAN NG ASIDO SA MUKHA NG EX-GF

April 29, 2023

Tags

Features

Nabulag ang paningin ng isang lalaki matapos siyang sabuyan ng asido sa mukha at tangkaing patayin ng kanyang dating nobya noong taong 2014.

Kinilala ng mga awtoridad ang biktima bilang si Raymond Marasigan habang tinukoy naman ang suspek bilang ang kanyang ex-girlfriend na si Beejay Martinez.

Taong 2007 nang maging magkarelasyon sina Raymond at Beejay. Naging maayos naman daw ang relasyon ng dalawa hanggang sa unti-unti raw nagbago ang lahat nang mag-iba ang ugali ni Beejay.

“Ayaw nya akong paglaruin ng computer games, ng basketball. Ayaw nya ng may barkada ako, ayaw nya ng umiinom ako,” kwento ni Raymond sa Bitag Crimedesk.

Tuwing sila ay nag aaway, nagbabanta rin daw si Beejay na tatapusin nito ang sarili niyang buhay. Ito raw ang nag-udyok kay Raymond upang tuldukan na ang limang taong relasyon nila ni Beejay.

“Nasakal na ako. Hindi ko na kaya tiisin. Nakipaghiwalay na ako,” ani nito.

Makalipas ang isang taon, bigla na lamang daw nagparamdam si Beejay kay Raymond upang magpatulong na makahanap ng bagong trabaho.

March 10, 2014, personal na nagkita ang dalawa sa isang clinic sa Valenzuela City kung saan nagtatrabaho si Beejay bilang isang receptionist.

Nung araw na yun, wala raw kamalay-malay si Raymond sa binabalak ng kanyang dating kasintahan na si Beejay.

Kwento ni Raymond, bigla nalang daw siyang sinabuyan ng asido sa mukha ni Beejay at pinagpapalo ng tubo sa ulo alas otso y media nang gabi ng March 10 sa loob ng nasabing clinic.

“Anong ginawa kong kasalanan bakit ginawa niya sa akin to. Pinarusahan niya ako eh. Di ko naman deserve to” wika ni Raymond.

Alamin ang buong istorya, PANOORIN: