Matataas na kalibre ng baril, mga bala, ito ang mga nahukay ng Philippine National Police – Criminal Investigation and Detection Group (PNP-CIDG) matapos isagawa ang raid sa sugar mill compound na pag-aari ni dating Negros Oriental Governor Pryde Henry Teves.
Ayon kay PNP spokesperson Police Col. Jean Fajardo, isang impormante ang nagsumbong hinggil sa mga nakatagong baril at bala sa HDJ Agri-Venture Corp. Tolong Compound sa Bayawan City.
Nakita din ang isang vault na naglalaman ng mahigit P17 milyon cash. Agad din itong ibinalik ng mga awtoridad dahil hindi ito kasama sa search warrant na illegal possession of firearms.
Paglilinaw din ni Fajardo na walang kinalaman ang nasabing raid sa pamamaslang kay Negros Oriental Gov. Roel Degamo.
Samantala, sa isang pahayag, sinabi ng dating gobernador na handa siyang makipagtulungan sa mga awtoridad matapos ang pagsalakay ng mga pulis sa kanyang compound.
Si Henry Teves ay kapatid ni 3rd District Congressman Arnie Teves.
Dalawang linggo na ang nakaraan nang halughugin ng CIDG ang mga bahay ni Congressman Teves. Nakumpiska dito ang iba’t ibang kalibre ng armas, mga bala at hand grenade.
