Nakatakdang muling sumabak sa aksyon ang “Angas ng Pinas” at dating three-division world champion na si Johnriel Casimero kontra kay WBO Global super bantamweight champion Filipus Nghitumbwa sa May 13 sa Okada Manila sa Parañaque City.
Si Casimero ay kasalukuyang rank no. 5 sa WBO. Siya ay may 32-4 win-loss record kung san 22 dito ay panalo via knockout.
Huling sumampa sa ibabaw ng lona ang Filipino slugger kontra kay Japanese boxer Ryo Akaho at nagwagi via second-round knockout victory noong Disyembre nakaraang taon sa Incheon, South Korea.
Samantala, may impresibong kartada na 12 wins, 1 loss at 11 knockouts naman ang makakalaban niyang South African boxer na si Nghitumbwa. Siya ay kasalukuyang rank no. 12 sa WBO.
Ang napipintong bakbakan ng dalawang boksingero ang kauna-unahang laban ng 34-anyos na si Casimero sa ilalim ng Japanese boxing promotion na Treasure Boxing.
Matapos umangat sa 122 pounds, sinabi ni Casimero na si Japanese boxing superstar Naoya “The Monster” Inoue parin ang inaasam niyang makakasagupa sa naturang dibisyon sa hinaharap.
