Umiskor ng technical knockout (TKO) victory ang undefeated Filipino boxer na si Charly Suarez kontra sa kapwa Olympian at wala pang talo na si Paul Fleming sa kanilang bakbakan na ginanap sa Kevin Betts Stadium sa Sydney, Australia kahapon, Marso 15.
Isang matalim na left hook ang pinakawalan ng 34-anyos na si Suarez (15-0, 9 knockouts) upang pataubin ang Australian boxer na si Fleming (28-1-1 18 KO’s) isang minuto ang natitira sa ika-12 round ng kanilang laban.
Sinubukan pang tumayo ni Fleming subalit pinaulanan ito ng mga kombinasyon ni Suarez dahilan upang itigil na ng referee sa ika-1:58 marka ang laban.
Sa kanyang pagkapanalo, nakuha ni Suarez ang regional titles sa IBF, WBC at WBA. Bukod dito, umarangkada din ang kanyang ranking sa mga nabanggit na sanctioning bodies.
Ito ang ikalawang laban ni Suarez sa labas ng bansa kung saan una na niyang tinalo ang Indonesian boxer na si Defry Palulu noong Disyembre nakaraang taon sa Vietnam.
Mula San Isidro, Davao Del Norte, si Suarez ay three-time Southeast Asian Games gold medalist na inirepresenta ang bansa noong 2016 Rio Olympics.
