Sinuspinde ni Pangulong Ferdinand “Bongbong” Marcos Jr. ang dagdag-singil sa mga contributors ng Philippine Health Insurance Corp. (PhilHealth) ngayong taon.
Sa isang memorandum na nilagdaan ni Executive Secretary Lucas Bersamin, iginiit ng Malakanyang na hindi pa handa ang mga Pinoy para sa dagdag na bayarin kahit humupa na ang pandemya dahil sa COVID-19.
Nakatakda sanang ipatupad ng Philhealth ngayong taon ang hanggang 4.5% na dagdag-singil sa premium contributions alinsunod sa Section 10 ng Universal Health Care (UHC) Act.
Ayon sa UHC law, taun-taon dapat itataas ang member premiums ng mga contributors para makamit ang five-percent limit hanggang 2025.
Sinabi ng Malakanyang na hindi pa napapanahon ang pagpapatupad ng dagdag na premium contributions, dahil hindi pa nakakarekober ang mga Pinoy sa epekto ng krisis at pandemya.
“In light of the prevailing socio economic challenges brought about by the Covid-19 pandemic, and to provide financial relief to our countrymen amidst these difficult times, please be informed that the President has directed the PhilHealth to suspend the above mentioned increase in premium rate and income ceiling for Calendar Year 2023,” ayon sa inilabas na kautusan ng Malakanyang.
