Kinumpirma ni Golden Boy Promotions founder na si Oscar De La Hoya na magaganap ang bakbakang Ryan Garcia at Gervonta Davis sa April 15.
Ito ay matapos niyang i-post sa kanyang instagram ang kanilang larawan ni Garcia na may hawak na kontrata.
“Devil is in the details,” ani ng Hall of Famer at dating six-division champion sa kanyang post kahapon. “April 15 lets go!” Matatandaang umami ng iba’t-ibang reaksyon ang pagbabanta noon ni De La Hoya na tatalikuran nito ang bakbakang Davis-Garcia kung hindi ito agad makakatanggap ng pirmadong kontrata mula sa dalawang boksingero.
Nov. 17, 2022 nang parehong inanunsyo nina Davis at Garcia sa kanilang social media ang kanilang laban na mangyayari sa first half ng taong 2023.
Sina Garcia at Davis ay parehong undefeated professional boxers na magsasagupaan sa superlightweight division.
Kasalukuyang may kartadang 23 wins, 0 loss at 19 knockouts si Garcia na huling sumabak sa aksyon noong July 2022 kontra kay Javier Fortuna.
Nakatakda sana itong lumaban sa Filipino boxer na si Mercito Gesta sa Jan. 28 subalit pinili nito na ituon ang atensyon sa napipintong bakbakan sa Mayo.
Samantala, may malinis na 28-0, 26 KO record naman ang makakasagupa niyang si Davis na pinataob kamakailan lang ang Dominican boxer na si Hector Luis Garcia noong Jan. 7
