Muling nagpahayag ng kagustuhang bumalik sa Gilas Pilipinas ni Kai Sotto subalit wala pang katiyakan kung kailan.
Nakatuon ngayon ang pansin ni Sotto sa bago nitong koponan sa Japan subalit hindi daw ito magiging hadlang sa kaniyang pangako na i-represent ang Pilipinas.
Kamakailan pumirma ng kontrata si Sotto upang maglaro sa Hiroshima Dragonflies matapos ang dalawang taong stint kasama ang Adelaide 36ers sa National Basketball League sa Australia.
Matatandaang hindi nakapaglaro ang 7-foot-3 center sa huling window ng FIBA World Cup 2023 Asian Qualifiers. Subalit nilinaw niya na hindi ito hadlang upang makabalik siya sa national basketball team ng Pilipinas.
“It’s the second half of the season already, the season will end probably in May,” wika ni Sotto sa isang introductory press noong Huwebes. “I don’t think it will hinder my national team commitment.”
Sa kabila nito, hindi naman nagbigay ng iba pang detalye si Sotto kung kailan siya makakabalik sa Gilas.
“As I said it depends. Right now, I’m just focused on these next three months with the team, help this team make the playoffs, clinch the championship,” ani Sotto. “And whatever happens after that, happens.”
Nakatakdang makapukpukan ng Hiroshima Dragonflies ang Ryukyu Golden Kings Okinawa kung saan makakaharap ni Sotto ang kababayan at fellow big man na si Carl Tamayo sa March 8.
