Ganito ang sinapit ng mag-asawang nanalo ng brand new Toyota Vios mula sa isang networking company na nag-ooperate sa probinsya ng Batangas.
Sumbong ng mag-asawang Mary Ann at Loreto Retiro sa Pambansang Sumbungan: #ipaBITAGmo, tinangay ‘diumano ng chief executive officer (CEO) ng kumpanyang Dreams Pure Opportunities (DPO) ang napanalunan nilang kotse.
Kinilala ng mag-asawa ang inirereklamong CEO na si Jeffrey Pabuaya Jr.
Ayon sa mag-asawang Retiro, ang Toyota Vios 2021 model (Alumina Jade Metallic) na may plakang DAV 1211 ay napanalunan nila dahil sa pagiging “top seller” sa kumpanya ni Pabuaya.
Dahil naka-benta ang mag-asawang Retiro ng daang-libong halaga ng mga food supplements, isang brand new na kotse ang kanilang insentibo.
Pero dahil parehong hindi marunong mag-maneho ang mag-asawa, nagprisinta umano si Pabuaya na siya na lamang ang mag-dedeliver sa kotse.
Laking gulat ng mag-asawa nang hindi na umano makarating ang sasakyan sa kanila.
Doble pasakit pa ang inabot ng mag-asawa dahil sila ang hinahabol ngayon ng card dealer para sa monthly amortization o ang buwanang bayad sa sasakyan.
Balikan ang pag-aksyon ng BITAG Multimedia Network (BMN) sa pamamagitan ng nag-iisang investigative program: Pambansang Sumbungan — #ipaBITAGmo!
