Kulong ang mag-asawang ex-mayor ng Amulung, Cagayan dahil sa korapsyon at pagwawaldas sa pondo ng bayan naaabot sa P18.7 milyon.
Base sa 134-pahinang desisyon na inilabas ng Sandiganbayan 6th Division, nitong November 3, 2022, napatunayang guilty sina Nicanor at Pacita de Leon na magkasunod na nanungkulang alkalde ng bayan ng Amulung, Cagayan mula 1996 hanggang 2010.
Si Nicanor ay hinatulan ng 27 taong pagkakakulong habang 20 taon naman sa misis nito kaugnay ng paglabag sa Anti-Graft and Corrupt Practices Act at Malversation of Public Funds.
Samantala, ang dating municipal treasurer na si Luzviminda Macasio na kasalukuyang wanted ay pinatawan naman ng 53 taong pagkakakulong.
Ang tatlong dating opisyal ay pinagmumulta rin ng kahalintulad sa perang kanilang nilustay at i-refund ang nasabing halaga sa kaban ng bayan.
Nabatid pa na sa special audit at imbestigasyon ng COA ay natukoy na 39 notices ng disallowance laban sa mag-asawa ang umano’y nakadispalko ng kabuuang P18,718,161.65
Inihayag pa ng anti-graft court na nabigo ang mag-asawa na magprisinta ng ebidensya upang mapawalang sala sa mga kasong nabanggit.
