Upang maiwasan ang deactivation, muling nagbigay ng paalala sa publiko ang Department of Information and Communications Technology (DICT) na irehistro ang kanilang mga SIM card bago sumapit ang deadline ngayong buwan.
“The DICT emphasizes that there will be no extension for the deadline, and strict implementation will be in effect,” saad ng DICT sa isang pahayag noong Abril 9.
“Failure to register will result in the deactivation of SIM cards, rendering them unusable for voice calls, text messaging, and mobile data services,” babala nito.
April 26 ang inilaan ng DICT na huling araw para sa SIM card registration.
Ayon sa DICT, malayo pa ang ahensya sa kanilang tina-target na numero sapagkat marami pang mga subscribers ang hindi pa nagpaparehistro.
Base sa huling datos na inilabas ng mga major Public Telecommunication Entities (PTEs) noong April 7, ang Smart Telecommunications Inc. ang may pinakaraming nagparehistro na may 31,110,508 registered subscribers.
Pumangalawa ang Globe Telecom Inc. na may 26,348,304 at DITO Telecommunication Corp. na may 4,711,456.
Sa kabuuan, mayroon pa lamang 62,170,268 registered SIMs o 36.79 percent ng 168,977,773 total subscribers sa buong bansa.
