Tila hindi pinagpawisan ang Tokyo Bronze medalist na si Eumir Felix Marcial matapos nitong tapusin sa ikalawang round ang laban kontra kay Argentinian boxer Ricardo Villalba sa San Antonio, Texas kahapon, Feb. 12.
Umpisa pa lang ay pinatikim na agad ng 27-anyos na si Marcial ng isang mabigat na left hook ang 33-anyos na si Villalba upang lumuhod ito sa canvass 1:22 minuto ang nalalabi sa unang round.
Muling pinabagsak ng Zamboangeño si Villalba sa ika-48 segundo ng ikalawang round matapos ang mabibigat na suntok na pinakawalan nito sa mukha ng beteranong boksingero.
Sinubukang tumayo ni Villalba subalit itinigil na ng referee ang laban at tinanghal na panalo si Marcial via stoppage.
“Glory to God! We are still undfeated! Humbled to have won the fight against a tough veteran, Argentinian Ricardo Ruben Villalba via KO after the 2nd round. All my training has paid off and my hard work bore fruit of our labor,” ani Marcial sa kanyang social media post kahapon.
“Like I said during interviews, I have learned a lot in my last three professional fights. I am most grateful to have had a very productive training with my camp and I am just happy to have shown the fans what I’ve improved on and prepared for over the last few months.”
Umarangkada sa malinis na 4 wins at 2 knockouts si Marcial matapos ang knockout victory habang sumadsad naman sa 20-8-1 (8 KOs) si Villalba.
