Ipinag-utos ni Pangulong Ferdinand Marcos, Jr. ang isang comprehensive plan para maiwasan ang pagbaha sa Metro Manila.
Sa kaniyang video message na inilabas sa Presidential Communications Office Facebook page, ipinag-utos na ni Marcos sa Water Resources Management Office ng Environment Department ang pagpapatayo ng water impounding facilities.
“Huwag natin naman sana tinatapon ‘yung tubig dahil kailangan na natin iyang tubig na iyan. So, gumagawa rin kami ng paraan para maipon ang tubig,” ani Marcos
Binanggit ng Pangulo ang flood control projects ng DPWH sa Metro Manila at sa paligid nito na may budget na P351 billion.
“Naghahanap ngayon kami ng mga lugar sa labas ng Maynila kung saan puwedeng maglagay ng mga malaking large na impounding areas. Para doon natin kokontrolin, hindi na papasok dito sa Maynila. At mayroon pa tayong naipon na tubig para sa agrikultura, para sa iba’t ibang gamit,” dagdag ni Marcos.
Martes nang magkaroon ng sectoral meeting si Marcos sa DPWH kung saan tinalakay din nila ang pagresolba ng pagbaha sa mga lugar sa Pampanga, Cavite, Leyte at maging sa Cagayan de Oro City.
