Maari nang simulant ng Philippine National Police (PNP) ang pagpapatupad ng search warrants matapos maglabas ng cease and desist order ang Philippine Amusement and Gaming Corporation (PAGCOR) na magpapatigil sa operasyon ng isang Philippine Offshore Gaming Operator (POGO) establishment na ni-raid sa Las Piñas City noong isang linggo.
Sa kaniyang pagharap sa mga reporters araw ng Biyernes (July 7), sinabi ni PNP public information office chief Brig. Gen. Redrico Maranan na patunay lamang na nagkakatulungan sila sa pagsugpo ng human trafficking at iba pang cybercrimes sa ginawang aksyon ng PAGCOR laban sa Xinchuang Network Technology, Inc.
“Ito ay obligasyon at responsibilidad ng lahat ng mga ahensya ng pamahalaan na may kinalaman para masiguro natin na yung ating POGO industry ay talagang malinis laban diyan sa mga iba’t ibang activities na ating natutunghayan at nadidiskubre upon implementation nitong mga search warrants,” ani Maranan.
Mayroon nang 781 ang na-proseso sa kabuuang 1,239 foreign workers na natagpuan sa loob ng isang compound sa isinagawang raid noong June 27.
Pitong iba pa na may warrants of arrest ang nailipat na sa Bureau of Immigration (BI) para sumailalim sa repatriation procedure.
“Sa ngayon ay tuloy tuloy ‘yung coordination natin sa BI at tayo ay nagpapasalamat sa kanila sapagkat all out naman ‘yung support ng BI although mandate naman nila ‘yan ang mag-process ng mga foreign nationals (Right now, our coordination with the BI continues and we are grateful to them because of the all-out support, although it is really their mandate to process foreign nationals),” ayon kay Maranan.
Sa isang show cause order na inilabas noong July 2, ipinag-utos ng PAGCOR sa Xinchuang para depensahan ang alegasyon laban sa kanila at ang dahilan kung bakit hindi dapat ipawalang-bisa ang Certificate of Accreditation and Authority to Operate. “We condemn all criminal activities that violate Philippine laws and human rights — regardless of nationality. As we have always said before, PAGCOR will not hesitate to impose sanctions on erring licensees and accredited service providers. Similarly, we will continue to cooperate with our partner law enforcement agencies to ensure that responsible and regulated gaming is observed,” ayon kay PAGCOR chairperson at chief executive officer Alejandro Tengco sa isang statement.
