Isa ang nasawi at 11 ang naiulat na nasugatan matapos bombahin ang isang pampasaherong bus sa Sultan Kudarat, Linggo ng umaga.
Mariing kinondena ni Joint Task Force Central at 6th Infantry “Kampilan” Division Commander Major General Roy Galido ang pambobomba ng bus ng Yellow Bus Lines (YBL).
Patungo na sana ng Koronadal City ang bus galing Kidapawan, North Cotabato nang bigla itong sumabog sa Barangay Isabela, Tacurong City.
Isang pasahero ang agad na binawian ng buhay sa insidente. Isinugod naman sa St. Louis Hospital ang 11 pang nasugatan.
Dagdag ni Gen. Galido, mayroon nang lead ang militar at ang Philippine National Police (PNP) sa mga posibleng nasa likod ng pambobomba.
Regular na aniyang nakakatanggap na banta ang YBL mula sa hindi pa matukoy na grupo.
Makikipagtulungan na din aniya ang militar sa mga Police investigators para matukoy at manutralisa ang mga teroristang responsable sa insidente.
“The YBL has been constantly receiving extortion messages ever since and we have been working with them. Hindi lang matiyempuhan kaya siguro nag-counteract,” sabi pa ng naturang opisyal.
