Binawian ng buhay ang isang security guard matapos itong umanong atakihin sa puso habang nasa oras ng trabaho sa Lipa City, Batangas.
Kinilala ang pumanaw na security guard na si 38-anyos na si Ronald “Jepoy” Abao na natagpuan na lamang na wala ng buhay sa binabantayan nitong gusali sa nasabing lugar.
“Hindi namin inaasahan yung nangyari. Napakabait ng kapatid ko masakit para sa amin yung biglaang pagkamatay niya,” wika ng kapatid ni Ronald na si Jenevein sa isang panayam ng BITAG.
Panganay sa walong magkakapatid ang tubong Gingoog City, Misamis Oriental na si Ronald. Ayon kay Jenevein, matagal nang panahon nang huli silang magkita ng kanyang kuya.
“15 taon na simula nung umalis siya dito. Lagi ko tinatanong sa kanya kung kailan siya uuwi dito sabi niya sakin uuwi rin daw siya hintayin lang daw namin malapit na,” ani Jenevein.
Kahapon (April 27), naiuwi na sa kanyang pamilya sa Misamis Oriental ang labi ni Ronald sa tulong ng security agency na kanyang pinapasukan.
Nakatakdang ihimlay si Ronald sa kanyang huling hantungan sa darating na Linggo, April 30.
