Nanatiling matatag ang approval at trust rating ni President Ferdinand Marcos Jr. at Vice-President Sara Duterte batay sa inilabas na survey ng Pulse Asia nitong Miyerkules.
Sa kanyang pagganap bilang chief executive, nakakuha ng 78% approval rating si Marcos, samantala 83% naman si Duterte.
“Majority approval scores are enjoyed by the President and the Vice-President in all geographic areas and socio-economic groupings,” saad ng Pulse Asia.
Ayon sa Pulse Asia, halos hindi nagbago ang rating ng dalawang lider na isinagawang survey noong November 2022 hanggang March 2023.
Kinilala sila bilang “trusted by most of the country’s adult population,” ayon sa Pulse Asia.
Nakakuha ng 80% trust rating si Marcos samantala 85% naman si Duterte.
Samantala, tumabla naman sina Senate President Juan Miguel Zubiri at House Speaker Martin Romualdez sa kanilang approval ratings matapos silang makakakuha ng 51 percent.
Pagdating naman sa trust rating umangat bahagya si Zubiri na nakakuha ng 48% at 44% naman ang kay Romualdez.
Sa mga national officials, pinakamababa sa survey si Supreme Court Chief Justice Alexander Gesmundo na nakakuha ng 43 percent approval at 39 percent trust rating.
