Ilang taon nang kalbaryo ng mga taga-Laguna ang umano’y dugyot na supply ng tubig; kung hindi raw amoy kalawang – halos hindi na ito mapakinabangan dahil kulay putik ang lumalabas na tubig sa kanilang gripo.
Isang ginang ang nagpasaklolo sa investigative public service program ng BITAG Multimedia Network (BMN) upang ireklamo ang hindi maayos na serbisyo ng Prime Water Company.
Humiling sa Pambansang Sumbungan: #ipaBITAGmo ang complainant na itago ang kanyang pagkakakilanlan dahil ang inirereklamo niyang water utility ay pag-aari ng real estate magnate na si dating Senate President Manny Villar.
Kwento ng ginang na residente ng San Pablo, Laguna, hindi na raw nila kayang sikmurain ang mabahong supply ng Prime Water.
Bukod umano sa marumi ang tubig, hindi rin daw katanggap-tanggap ang singil ng water utility sa kada cubic meter na konsumo.
Ayon sa complainant, matagal na nilang inirereklamo ang palpak na serbisyo ng Prime Water sa Laguna subalit hindi ito inaaksyunan ng water utility.
Ilang residente rin mula sa San Jose Del Monte Bulacan ang nagrereklamo sa serbisyo ng Prime Water.
Sinubukang kontakin ng programang #ipaBITAGmo ang mga opisyal ng Prime Water Laguna subalit hindi sinasagot ang tawag ng BITAG Multimedia Network (BMN).
Nagsasagawa na ng malalimang imbestigasyon ang programang #ipaBITAGmo upang solusyonan ang reklamo ng mga consumer.
Ang sumbong, panoorin sa:
