Tiniyak ng Department of Energy (DOE) na walang mangyayaring rotational brownout ngayong tag-araw.
Sa isinagawang public briefing ng Laging Handa kahapon, sinabi ni DOE Undersecretary Rowena Guevarra na bagamat numinipis ang power reserves tuwing summer season dahil tumataas ang demand sa kuryente, wala daw rotational brownout.
“As you know, our power outlook during summer is that there is a thin difference between supply and demand,” ayon sa opisyal.
“Based on our power outlook last January, we do not see such situation… What we have are possible yellow alerts in Luzon and Visayas, but not brownouts,” dadgdag pa ni Guevarra.
Sa 2023 outlook ng ahensya, inaasahang ilalagay sa ilalim ng yellow alert ang Luzon Grid sa “week 11” ng Marso, weeks 13 at 17 ng Abril, at lahat ng linggo ng Mayo, weeks 22 at 23 ng Hunyo, week 35 ng Setyembre, week 42 ng Oktubre at week 47 ng Nobyembre.
Ang yellow alert ay itataas kapag walang sapat na mga reserba upang mabigyan ang pinakamalaking gumaganang generating unit sa mga panahon na iyon, pero hindi nangangahulugang magkakaroon ng power outage.
Itinataas naman ang Red alert kung ang hindi na balanse ang demand sa suplay ng enerhiya na nagreresulta sa rotating power interruptions.
Kaugnay nito, sinabi rin ni Guevarra na nakipag-usap na ang DOE at ang National Grid Corp. of the Philippines (NGCP) sa mga power transmission operator na walang magsasagawa ng maintenance shutdown sa tag-araw.
“For summer, it is not only our power industry that needs to help each other, but our consumers as well. They should conserve and use efficient technologies in their homes or for commercial and industries,” saad ni Guevarra.
