Ikinagulat ng mga residente sa Bacolod City ang nakitang dalawang putol na kamay ng tao sa loob ng isang container ng ice cream.
Sa paglalarawan, nakababad ang mga parte ng katawan sa sabaw at may kasama pang sahog. Natagpuan ito sa basurahan na malapit sa material recovery facility ng Purok Kagaykay, Barangay 2, Bacolod City noong madaling araw ng Miyerkules. May nakita din papel na may nakasulat na mga pangalan ng mga pinaghihinalaang sangkot sa iligal na droga.
Ayon sa report, karamihan sa mga pangalan na ito ay dati nang nakulong dahil sa droga.
Base sa kuha ng CCTV, isang putting van ang huminto sa tinukoy na basurahan kung saan natagpuan ang putol na kamay. Posible umanong ang mga sakay nito ang nag-iwan ng lalagyan ng ice cream.
Hindi naman malinaw sa kuha ng CCTV ang plaka ng sasakyan at ang mga sakay nito.
Kasalukuyang isinasailalim sa DNA testing ang dalawang natagpuang kamay ng tao ganundin ang pagbeberipika sa mga pangalang nakalista sa papel.
