Isang alyas “Badjao” ang pinagbabaril sa ulo matapos matuklasang tawas sa halip na ‘shabu’ ang ibinenta nitong item sa isang hindi pa nakikilalang suspek sa Bacolod City, kamakailan.
Kinilala ng Bacolod City Police ang biktima na si Mark Christian John Luceño, alyas “Badjao”, 31, residente ng Purok Kingfisher A, Brgy. 16, Bacolod City.
Sa paunang imbestigasyon ng Police Station 1 ng Bacolod City Police, pinagbabaril sa ulo ang biktima noong Biyernes, Nob. 25, habang ito ay nagpapahinga sa kanyang pinapasadang tricycle.
Dead-on-the-spot si Badjao at mabilis na tumakas ang salarin lulan ng motorsiklo.
Ayon kay Major Ramel Sarona, hepe ng Police Station 1, nagkaroon ng kaalitan si Luceño isang araw matapos umano itong magbenta ng tawas sa halip na ‘shabu’ sa isang customer.
Nabatid na si Luceño ay isang ex-convict sa kasong pagnanakaw at nakalaya matapos ang kanyang sintensya.
Inaalam pa ng pulisya kung may iba pang motibo sa pamamaslang maliban sa onsehan sa droga.
