Kritikal ang human resource head ng isang ospital sa Dagupan, Pangasinan matapos pagbabarilin ng dalawang hindi pa nakikilalang suspek kahapon, Marso 14.
Nakilala ang biktima na si Bernadette Velasco Abella, 45-anyos, HR head ng Dagupan Doctors Villaflor and Memorial Hospital at residente ng Claudio P. Ordoñez Compound sa Barangay Caranglaan.
Sa inisyal na imbestigasyon ng pulisya, papasok ng trabaho si Abella alas siyete ng umaga nang dumating ang dalawang suspek at pinagbabaril ang biktima sa tapat ng kanyang tinitirahan.
Agad isinugod sa pagamutan si Abella kung saan siya ay kasalukuyang inoobserbahan sa Intensive Care Unit (ICU).
Samantala, mabilis namang tumakas ang mga suspek matapos ang krimen na nagtamo ng dalawang tama ng bala sa dibdib ang biktima habang tatlo naman sa tiyan.
Patuloy na inaalam ng mga awtoridad ang pagkakakilanlan ng mga suspek gayundin ang motibo nito sa nangyaring krimen.
