Nahaharap sa patong-patong na kaso ang walong kapulisan sa Sultan Kudarat kaugnay sa pamamaril sa tatlong binatilyo noong Disyembre nakaraang taon.
Kahapon, March 13, nagtungo sa Department of Justice (DOJ) ang pamilya ng mga biktimang sina Samanoden Mustapha Ali, 19-anyos, Anshad Ansa, 20, at Horton Ansa Jr. (19) upang magsampa ng kasong murder, planting of evidence, falsification of documents at grave misconduct laban sa mga inirereklamong pulis ng Lambayong Municipal Police Station.
Kinilala ang mga akusado bilang ang dating hepe ng Lambayong police na si Major Jehnameel Toñacao, Staff Master Sergeant Syril Mahaddi, Corporal Elpedio Garlit, Cpl. Joffrey Apalla, Patrolman Nicol Dion Toreja, Pat. Basser Mako, Pat. Mario Rombaoa Jr. at Pat. Roldan Claveria.
Base sa ulat ng Lambayong PNP, sinubukan nilang pahintuin ang tatlong binatilyo sakay ng motorsiklo sa isang checkpoint sa Purok 4, Brgy. Didtaras subalit humarurot ito ng takbo at nakipaghabulan.
Nang bumangga ang kanilang sinasakyan, nakipagpalitan daw umano ito ng putok sa mga awtoridad.
Ayon pa sa mga pulis, narekober nila ang ilang Ilegal na droga, baril, at granada mula sa mga biktima.
Mariin naman pinabulaan ng pamilya ng mga biktima ang alegasyon ng kapulisan.
Kamakailan, sinabi ng pulis at ama ng isa sa mga biktima na si Horton Ansa Sr., na may mga indikasyon na ang kanyang anak at ang iba pang mga biktima ay pinagbabaril nang malapitan.
Base sa ginawang imbestigasyon ng NBI, lumalabas din na dumanas ng torture ang mga biktima bago sila pinaslang.
