Arestado ng mga operatiba ng Criminal Investigation and Detection Group – Cavite ang isang babae na nagpapanggap na lisensyadong dentista sa Trece Martires, Cavite nitong Biyernes, Nobyembre 4.
Kinilala ang suspect na si Syrah Rodriguez, isang dentistry student at residente ng Brgy. Inocencio, Trece Martires City, Cavite.
Natanggap ng CIDG – Cavite ang reklamo mula mismo sa mga opisyal ng Philippine Dental Association (PDA) laban sa suspek.
Sa panayam ng Bitag Multimedia Network kay Dr. Narisa Ragos, Deputy Chairman Campaign Against Illegal Practice Philippine Dental Association, hindi maaaring magtayo ng klinika o magsagawa ng dental procedure ang isang dentistry student.
Dagdag pa ni Dr. Ragos, delikado umano na sumailalim ang isang pasyente sa sa iba-ibang dental procedures sa kamay ng mga nagpapanggap na lisensyadong dentista.
“Maaring mako-compromise ang dental health ng mga pasyente at posibleng mag cause ng permanent damage sa oral cavity,” ayon kay Dr. Ragos
Ayon sa PDA, nasa mahigit 50 kaso na ng mga illegal practitioners ang ipina-aresto nila dahil sa pagpapanggap na professional practitioners.
Mahaharap sa kasong paglabag sa Republic Act 9484 Philippine Dental Act of 2007 ang suspek.
Payo ng PDA sa publiko, tiyakin na nakapaskil ang certificate of registration mula sa Professional Registration Commission (PRC) ang klinika. Maaari rin bumisita sa www.prc.gov.ph upang makita kung lehitimo ang isang dentista.
