Kulong ang dalawang vlogger matapos gumawa ng prank sa isang gasoline station sa Brgy. Poblacion, Mawab, Davao de Oro kahapon, Enero 18.
Kinilala ng mga tauhan ng Police Regional Office 11 sa ilalim ng Mawab Police Station sina Jonel Cordero at Arnold Rabi dahil sa ginawang prank o practical joke sa mga tauhan ng Municipal Disaster Risk Reduction and Management Office (MDRRMO).
Ayon sa imbestigador ng Mawab PS, bumili umano ang suspek na si Cordero ng gasolina na nagkakahalaga ng sampung piso (Php 10.00) at inilagay sa isang bote ng softdrinks.
Ininom niya ang ang laman ng nasabing bote, nagkunwaring nahihilo at umarteng nagsusuka at nalason habang kinukunan ng video ng kapwa-vlogger na si Rabi.
Agad na tumawag ang mga empleyado ng gasolinahan sa MDRRMO at isinagawa ang medical assessment at first aid.
Sa gulat ng dalawang vloggers, bigla nilang sinabing prank lang ang ginawa nila at ipinagapat na energy drink ang kanyang ininom at hindi gasolina.
Dahil sa ginawang abala at alarma sa mga tauhan ng MDRMMO, inaresto ang dalawa prankster.
Humingi naman ng tawad ang dalawa subalit sasampahan pa rin sila ng kasong Alarm and Scandal sa ilalim ng Article 155 ng Revised Penal Code.
